Bydd Mostyn, gyda chefnogaeth hael Colwinston Charitable Trust, yn cefnogi pedwar comisiwn newydd gan artistiaid sy’n dod i’r amlwg yng Nghymru a fydd yn rhan o sioe haf Mostyn 2025, wedi’u rhaglennu ar y cyd â’r artist Jeremy Deller.
Gwahoddir artistiaid a gwneuthurwyr gweledol, sy’n gweithio naill ai’n unigol neu ar y cyd ag eraill, i gyflwyno cynnig sy’n ymateb i themâu sy’n ymwneud â choffáu, dathlu, arddangos a thrawsnewid. Gallai’r cynnig fod o ddiddordeb penodol i’ch ymarfer neu fod yn berthnasol i’ch cymuned, tirwedd neu’ch treftadaeth ddiwylliannol. Rydym yn annog cynigion sy’n cwmpasu amrywiaeth o ddisgyblaethau gan gynnwys, ond heb fod yn gyfyngedig i, sain, delwedd symudol, ffotograffiaeth, print, testun, cerflunwaith, tecstilau, perfformiad ac ati.
Bydd y pedwar comisiwn yn cael eu dewis gan reithgor a’u harddangos ym Mostyn rhwng Mehefin a Hydref 2025, gyda’r lansiad yn yr oriel yn digwydd ym mis Mehefin ochr yn ochr â’r comisiwn DU-gyfan, mewn partneriaeth â’r National Gallery, Llundain, The Triumph of Art.
Cyflwyniadau
Dylid anfon cyflwyniadau at [email protected] gyda’ch enw llawn_ Mostyn2025_Commission yn y llinell bwnc a dylai gynnwys:
- Llythyr (500 gair ar y mwyaf) neu recordiad sain neu fideo 4 munud ar y mwyaf yn amlinellu eich gwaith arfaethedig
- Dolen i bortffolio o weithiau diweddar
- Datganiad artist byr, bywgraffiad neu CV i chi a phob ymarferwr sydd wedi’u cynnwys yn eich cynnig (1 tudalen ar y mwyaf)
- Eich manylion cyswllt
Os oes angen unrhyw gymorth arnoch i gyflwyno’ch cais gallwch e-bostio [email protected] neu ffonio 01492879201.
Ni ddylai cyfanswm maint y ffeiliau fod yn fwy na 6MB.
Y dyddiad cau ar gyfer y cyfle hwn yw’r 12fed Ionawr 2025.
Sylwch y bydd hawliau’r gwaith yn aros gyda’r artist(iaid) a ddewiswyd
Cyllid
Cyfanswm y gyllideb gomisiynu: £5,000 sy’n cynnwys yr holl gostau a TAW. Dylai’r gyllideb hon gynnwys ffi’r artist a’r holl gostau cynhyrchu a chludiant, i’w trafod gydag artistiaid a gomisiynir.
Bydd Mostyn yn cynnig cymorth pellach ar gyfer gweithgarwch ymgysylltu cyhoeddus sy’ gysylltiedig, yn ogystal â chyngor ar gynhyrchu, canllawiau curadurol a chyflwyniad i gysylltiadau defnyddiol lle bo angen.
Llinell amser
- Ceisiadau’n cau: Hanner nos dydd Sul 12fed Ionawr 2024
- Hysbyswyd Artistiaid a Gomisiynwyd: yn ystod yr wythnos yn dechrau 3 Chwefror 2025
- Gwaith i lansio: 20fed Mehefin 2025
Partneriaid:
Sefydlwyd The Colwinston Charitable Trust ym 1995 ac mae’n dosbarthu grantiau i Elusennau Cofrestredig y DU i ddarparu gwaith o ansawdd uchel yn y Celfyddydau Perfformio Byw a’r Celfyddydau Gweledol. Mae’r cyllid wedi’i gyfeirio’n bennaf at gefnogi gweithgarwch sydd o fudd i Gymru.
Mae Mostyn yn oriel gyhoeddus, mynediad am ddim yn Llandudno, Cymru, sy’n cyflwyno rhaglen o gelf gyfoes ryngwladol ragorol. Mae ein rhaglen ymgysylltu â’r cyhoedd yn cynnwys sgyrsiau, teithiau a gweithdai, ac rydym yn cefnogi dros 400 o artistiaid drwy ein siop adnabyddus.
Mae Mostyn yn sefydliad Portffolio Celfyddydau Cymru, sy’n derbyn cymorth ariannol gan Gyngor Celfyddydau Cymru. Rydym yn rhan o Plus TATE, ac yn un mewn partneriaeth o un ar ddeg o leoliadau CELF ledled Cymru, gan alluogi pobl i gael mynediad at a mwynhau gweithiau celf o gasgliad cenedlaethol Cymru o gelf gyfoes. Ni yw partner Cymreig yr National Gallery, Llundain, comisiwn daucanmlwyddiant The Triumph of Art, gyda Jeremy Deller.
Astudiodd Jeremy Deller (g. 1966, Llundain) Hanes Celf yn Sefydliad Courtauld ac ym Mhrifysgol Sussex. Dechreuodd wneud gweithiau celf yn gynnar yn y 1990au, gan ddangos ei waith yn aml y tu allan i’r orielau confensiynol. Gyda phrosiectau’n cynnwys ‘The Battle of Orgreave’ (2001) a ‘We’re here because we’re here’ (2016), mae Deller yn adnabyddus am weithiau sy’n cynnwys pobl ac sy’n archwilio themâu celfyddyd perfformio a diwylliant poblogaidd. Mae ‘The Triumph of Art’ yn gomisiwn DU cyfan gan Nation Gallery Llundain, a gychwynnwyd gan Jeremy Deller i nodi’r rôl y mae celf yn ei chwarae yn ein casgliadau cyhoeddus, mannau diwylliannol ac amgueddfeydd. Mae Deller wedi cael ei hysbrydoli gan orymdeithiau gwyllt y peintiwr o’r Dadeni Titian o’r duwiau Rhufeinig, fel yn ei enwog Bacchus ac Ariadne (1520-23), yn ogystal â llên gwerin, dawnsiau, dramâu, diwylliant rêf a chelfyddydau poblogaidd.
Delwedd: Jeremy Deller, Justified and Ancient, 2014
